Næsta ár verða inntøkurnr hjá landskassanum 8.076,8 milliónir. Tað sæst, nú Aksel V. Johannesen, landsstýrismaður í fíggjarmálum, hevur lagt uppskotið til fíggjarlóg fyri næsta ár, fyri Løgtingið. Útreiðslurnar verða 8.038,3 milliónir og tað merkir, at 38,5 milliónir verða í avlopi. Av útreiðslunum fara 7.457,7 milliónir til rakstur, og 580,6 milliónir eru til útbyggingar av ymsum slagi.
Næsta ár verða sparingr og effektiviseringar fyri 80 milliónir. Eitt nú verða onkrar sendistovur uttanlands niðurlagdar og aðrastðni verður virksemið avmarkað.
Harumframt verða almennu stovnarnir Nám, Undirvísingarstýrið og Sernám, verða lagdir saman.
– Aðrar effektiviseringar verða gjørdar, tá ið nýskipanarnevndin kemur við sínum tilmælum, sigur Aksel V. Johannesen
Hinvegin verða 66 milliónir settar av til nýggja Fróðskaparsetrið og lestrarbýlingin í Havn. Men tað eru fleiri milliónir longu tøkar frá í fjør, so tilsamans eru einar 100 milliónir at byggja fyri.
Og peningur verður eisini játtaður til arbeiðið at útvega Ítróttarháskúlanum í Suðuroy nýggjan skúlabygning.
Lestrarstuðulin til fólk undir útbúgving skal hækkast meiri hvørt árið enn higartil, og somuleiðis verður játtanin til tolleftirlitið hækkað fyri tálma rúsevnasmugling.
Pensjónistar skulu hava betri møguleikar fyri at arbeiða. Landsstýrið ætlar at hækka upphæddina, pensjónistar kunnu tjena, áðrenn teir missa pensjón. Nú er inntøkumarkið 61.900 krónur um árið, men endamálið er at hækka tað upp í 300.000 krónur.
Uppskot um hetta verður lagt fyri Løgtingið í vetur, og eftir ætlan verður skipanin sett í verk 1. juli næsta ár.
Broytingin kostar landskassanum 50 milliónir um árið og næsta ár fer tað sostatt at kosta umleið 25 milliónir.
Verður uppskotið samtykt í Løgtinginum, minkar avlopið á fíggjarlógini niður í 13,5 milliónir
Landsstýrið hevur harumframt gjørt av, at samdøgurs- og uttanlandsfrádrátturin ikki skal minka meira, og at løntakarar skulu sleppa at at draga limagjald til fakfeløg, frá í inntøku, men hámarkið verður 2.000 krónur næsta ár, men í 2028 hækka tað upp í 4.000 krónir.
