Sandoy Smíð hevur fingið eina góða byrjan við síni fyrstu raðhúsaverkætlan. Øll trý húsini í nýggjastu útstykkingini á Sandi eru seld, hóast byggingin júst er farin í gongd.

– Hetta er fyrsta royndin hjá okkum við hesum, og alt er selt – uttan at vera lýst til sølu, sigur Brandur Sandoy, timburmeistari, á sínum Facebook-vanga.

Talan er um fyrstu raðhúsini av hesum slagnum í Sandoynni, sum verða bygd við sølu fyri eyga.

Trý hús – øll hava fingið keypara

Sandoy Smíð stendur bæði fyri byggingini og søluni. Tvey av raðhúsunum verða 110 fermetrar, meðan tað triðja verður 116 fermetrar.

Øll húsini fáa trý kømur, tvey vesi, terassu og bilskýli. Tvey verða seld innilokað, meðan tað triðja verður selt lyklaklárt.

Byggingin er væl áleiðis

Arbeiðið við raðhúsunum er farið í gongd. Sambært Brandi Sandoy hava teir arbeitt við at smíða húsaelementini í eina viku og eru longu komnir meira enn í helvt við teimum.

Timburmeistarin vónar, at veðrið verður til vildar næstu tvær vikurnar, so húsini kunnu reisast.

Sandoy Smíð hevur sostatt longu selt øll trý húsini, áðrenn tey eru komin upp at standa.