Nýklakti føroyameistarin Meinhard E. Olsen er aftur í landsliðshópinum, nú hann er komin fyri seg aftur eftir langan skaðasteðg. Tað boðaði Eyðun Klakstein landsliðsvenjari frá, nú hann tók landsliðið út til teir báðar síðstu dystirnar í hesi Nations League kappingini.

Nýggjur á listanum er Ari Olsen, sum spælir við Vendsyssel FF í næstbestu donsku deildini. Hann hevur verð á landsliðnum einaferð áður. Tað var í Baltic Cup í juni, tá ið hann var á vøllinum í fimm minuttir ímóti Lettlandi.

Eyðun Klakstein landsliðsvenjari boðaði frá, at heimadysturin ímóti Kasakstan, sum verður mánadagin 16. november, verður klokkan 15, og at tað verður ókeypis atgongd til henda dystin.

-Vit hava møguleika at vinna næstfremsta plássið í bólkinum. Vit standa okkum væl á heimavølli, og tað er eingin ivi um, at tað hjálpir okkum, tá ið tað er nógv fólk kring vøllin, sigur Eyðun Klakstein landsliðsvenjari.