Tríggir ungir føroyskir borðtennisleikarar spældu sínar fyrstu almennu A-landsdystir, tá føroysku A-landsliðini hjá kvinnum og monnum um vikuskiftið kappaðust í Belgian Open í Verviers í Belgia.
Tey trý, sum á fyrsta sinni umboðaðu A-landsliðið í almennum dysti, vóru Rasmus Teitsson í Skorini, Hadassa S. Christiansen og Elsa Kathrina Gisladóttir. Tey eru ávikavist 14, 15 og 17 ára gomul.
Tilsamans sjey føroyingar luttóku. Kappingin var á ETTU-støði, og nógvir fulltíðarleikarar vóru við. Hóast harða mótstøðu megnaðu flestu føroysku leikararnir at vinna dystir.
Albert Weihe Wolfsberg stóð seg best av føroyingunum og vann tríggjar dystir.
Næsta uppgávan hjá føroyska A-landsliðnum verður Aarhus Open 10. og 11. oktober. Tá verður føroyska ungdómslandsliðið eisini við.
.jpg)
