Nógv hevur verið arbeitt fyri, at hesar fýra ítróttargreinarnar skulu takast við í OL-familjuna, og nú eru tær slopnar í gjøgnum nálareygað.

Tað var í mars 2019, at International Olympic Committee (IOC) fekk umbøn at taka hesar ítróttargreinarnar við í OL-familjuna til leikirnar í 2024, og nú er avgerð tikin um, at hesar ítróttargreinar verða tiknar við.

Hetta, við at fáa hesar ungdómligu ítróttargreinarnar við, verður sæð sum ein ætlan at náa út til fleiri sjónvarpssíggjarar.

Tað vóru annars fronsku fyriskipararnir av OL í París í 2024, ið komu við uppskotinum at fáa hesar fýra ítróttargreinarnar við.

Tríggjar av hesum ítróttargreinunum verða eisini við til OL í Tokyo komandi ár, meðan skrykkjdansur verður fyrstu ferð við í París, 2024.

Aðalskrivarin fyri World DanceSport Federation. Shawn Tay, heldur, at hetta er ikki einans ein søguligt fyri b-boys og b-girls (breakdance-dreingir og gentur), sum hann orðar seg, men fyri allar dansarar kring heimin.

- Hetta var ein ordans liðinnsatsur at fáa skrykkjadans við, so nú skulu vit syrgja fyri, at kappingin í París 2024 verður ógloymandi, sigur hann.

Tíðindini um hesa nýggju OL-ítróttargreinina fellur ikki í góða jørð hjá øllum. Avstralska squash stjørnan Michelle Martin sigur, at hetta er ein beinleiðis háðan – at skrykkjdansur er við sum OL-ítróttargrein, meðan squash ikki verður tað.

- Ein undrast, hvønn veg OL fer. Eg kenni fólk, ið siga, at skrykkjdansur ikki er ein ítróttur, men...ja, eg skilji tað ikki, sigur Michelle Martin við avstralska AAP.