Klaksvíkar kommuna er farin undir at breiðka Biskupsstøðgøtu við umleið trimum metrum. Samstundis verða fyrireikingar gjørdar til at flyta busssteðgiplássini úr miðbýnum.

Á strekkinum millum Varpið og Norðoya Sparikassa verða busslummar gjørdir báðum megin vegin.

Endamálið er at bøta um ferðslutrygdina og skapa betri umstøður fyri bussferðsluna, serliga fyri skúlabørn, sum dagliga ferðast til og frá skúla.

Tá arbeiðið er liðugt, verða nýggj og rúmlig busssteðgipláss á báðum síðum av Biskupsstøðgøtu.

Runnar mugu víkja fyri busslummum

Vegaarbeiðið hevur við sær, at runnarnir sunnan fyri vegin verða tiknir burtur. Nøkur av teimum størri trøunum verða tó varðveitt og flutt í lundina við skúlan.

Vanliga verður økið prýtt við jólaljósum, men tað verður ikki gjørt í ár.

Tá arbeiðið er liðugt, verða nýggir runnar plantaðir sunnan fyri gongubreytina.