Arbeiðið við at skifta tekjuna á Christianskirkjuni í Klaksvík gongur eftir ætlan. Fyrst í september metti Jóhannes Berthelsen, arbeiðsformaður hjá ArtiCon, at arbeiðið var komið umleið hálvvegis.

Samstundis hevur arbeiðið avdúkað eina serliga heilsan úr fortíðini. Tá gamla tekjan varð tikin niður, komu nøvn undan, sum arbeiðsmenn høvdu ritað í brettir og panelfjalar, tá kirkjan varð bygd fyrst í 1960-árunum. Tað skrivar ArtiCon á teirra Facebook-vanga.

Tólv løg skulu skiftast

Talan er um eina umfatandi umvæling. Frá innasta lagnum og út til skifersteinarnar eru ikki færri enn 12 ymisk løg í tekjuni. Á sunnaru síðuni er arbeiðshæddin svarandi til umleið átta stillashæddir.

Fyrireikingarnar byrjaðu longu í vár. Ætlanin var tá at pakka kirkjuna inn í krympiplast, so arbeiðið kundi fara fram í turrum umstøðum, meðan tekjan varð tikin av og møguligar rotnar sperrur vórðu umvældar.

Kirkjan verður framvegis nýtt

Kirkjan skuldi halda fram at virka sum vanligt undir umvælingini. Bygningurin varð støvtryggjaður, og bæði orgulið og altartalvan skuldu verjast væl, meðan arbeiðið fór fram.

Upprunaliga varð roknað við, at arbeiðið at skifta tekjuna skuldi vera liðugt í oktober.

Sí fleiri myndir á Facebook-vanganum hjá ArtiCon