Nú er stutt eftir til festivalin í Sørvági, og fyrireikingarnar eru í hæddini. Áhugin fyri festivalinum er stórur, og vælumtókta eldratiltakið Eldrahugni, er longu útselt.
Á tónleikaskránni eru fleiri kend nøvn. Countrykongurin Hallur Joensen verður aftur at hoyra, og eisini Kristel Lisberg fer á pallin saman við bólki.
Harumframt fara Sørvings, Magni Christiansen, Danny & De Vitos, Strámenn umframt fleiri onnur, at seta lív í áskoðarafjøldina.
Úr útlondum koma vælkendir countrysangarar. Millum teirra eru Robert Mizzell og Ray Scott, sum fara at framføra góðan countrytónleik á Dungasandi og skapa rætta festivalstemningin.
Festivalurin hevur eisini tiltøk fyri børn og familjur, so nógv verður at taka seg til hjá teimum yngstu. Harumframt verður útimøti á skránni, sum er vorðið ein fastur partur av festivalinum.
Spurdur um hvørjar væntanir hann hevur fyri festivalin í ár, svarar fyriskipari Allan Samuelsen:
- Væntanirnar eru altíð at fáa ein hugnaligan og góðan festival. Tað er simpulthen tað.
Við sterkari tónleikaskrá, familjutiltøkum og góðum felagsskapi fer at liggja væl fyri hjá Country & Blues Festivalinum aftur í ár, at savna nógv fólk í Sørvági til nakrar hugnaligar og tónleikaríkar dagar, har countrytónleikur, samvera og góðar upplivingar verða í hásæti.
