Føroyskir luttakarar hava higartil fingið 8 milliónir evrur, svarandi til umleið 59,7 milliónir krónur, úr granskingarskránni Horizon Europe. Talan er um 26 stuðulsjáttanir og tilsamans 35 luttøkur í verkætlanum.

Tølini vórðu løgd fram á fjórða felagsfundinum millum Føroyar og ES um gransking og nýskapan, sum varð hildin í Brússel 30. september.

Sterk føroysk serfrøði

Flestu føroysku verkætlanirnar snúgva seg um veðurlag, umhvørvi, havtilfeingi, havgransking og arktiska gransking. Sambært ES vísir hetta, at føroysk serfrøði er høgt mett á hesum økjum.

Føroyar hava verið knýttar at granskingarskráunum hjá ES síðan FP7, og luttøkan er vaksin støðugt.

Næsti fundur í Tórshavn

Á fundinum varð eisini tosað um granskingartrygd, nýskapan, granskingarumhvørvi og avbjóðingar við at fíggja og menna nýggj vinnuvirki.

Næsti felagsfundurin er ætlaður at verða í Tórshavn í 2027.