Gentubólkurin FAROE5 hevur av álvara fingið vind í seglini aftur seinasta árið. Tær hava verið at hoyrt á fleiri pallum, millum annað á Lestrargonguni í Keypmannahavn, á Summar Festivalinum í Klaksvík og nú um vikuskiftið, tá tær spældu útselda konsert í OY.

Áhoyrararnir vóru sera væl við og sungu við til nærum øll løgini. Serligur fagnaður var, tá Marius DC kom á pallin sum gestur, og saman framførdu tey nýggja hittið Hjørtu Duka Kapp.

FAROE5 varð upprunaliga stovnað í 2008 við upptøkuroyndum, har leitað varð eftir røttu limunum til bólkin. Hugskotið er kent frá teimum stóru altjóða sjónvarpssangkappingunum, har nýggir tónleikabólkar verða settir saman gjøgnum upptøkuumfør. Nú, 18 ár seinni, tykist áhugin fyri bólkinum enn at vera líka stórur millum føroyskan ungdóm.