Sámal Petur í Grund, løgtingsmaður, vil hava greiðu á, um russisk fiskiskip, sum fáa loyvi at fiska í føroyskum sjógvi, kunnu vera ein hóttan móti trygdini í Føroyum.

Í skrivligum fyrispurningi til Bárð á Steig Nielsen, landsstýrismann í uttanríkis- og fiskivinnumálum, setur hann spurnartekin við trygdarmetingarnar og eftirlitið við russisku skipunum.

Minni veiða – men fleiri fiskidagar

Í fyrispurninginum verður víst á, at russisk fiskiskip hava fleiri fiskidagar í føroyskum sjógvi, hóast veiðan er minkað.

Sambært tølum, sum Sjúrður Skaale hevur víst á í Norðlýsinum, minkaði veiðan úr 92.413 tonsum fyrra hálvár 2025 niður í 78.558 tons fyrra hálvár 2026. Samstundis vaks talið av fiskidøgum úr 670 upp í 722.

Sámal Petur í Grund vil tí vita, um landsstýrið hevur kannað, hví russisku skipini brúka fleiri dagar í føroyskum sjógvi, samstundis sum tey fiska minni.

Stúrir fyri trygdini kring sjókaðlar

Í fyrispurninginum verður eisini víst á upplýsingar um illgrunasama ferðslu hjá russiskum skipum nær við týdningarmiklar samskiftiskaðlar.

Løgtingsmaðurin spyr, hvussu myndugleikarnir hava eftirlit við, at skipini ikki reka annað virksemi, sum kann hótta trygdina í Føroyum.

Hann vil eisini vita, um landsstýrið ætlar at leggja størri dent á trygdina í komandi fiskivinnusamráðingum við Russland.

Í fyrispurninginum verður undirstrikað, at upplýsingarnar ikki í sjálvum sær prógva ólógligt virksemi.

Kortini verður mett, at neyðugt er at fáa greiðu á, hvussu føroyskir myndugleikar meta um trygdina og hava eftirlit við russiskum fiskiskipum.