11 toskar, sum vórðu merktir í 2024 og 2025, eru aftur fingnir á sama staði vestan fyri Skúgvoynna.

Toskarnir vórðu fingnir undir árliga merkingartúrinum hjá Havstovuni. Átta teirra vórðu merktir í 2025 og tríggir í 2024.

Sambært Havstovuni bendir hetta á, at fiskarnir hava verið rættiliga støðufastir.

1.160 fiskar merktir

Hóast veður og onnur viðurskifti styttu merkingartúrin, eydnaðist at merkja 1.160 fiskar á Landgrunninum í ár.

Av teimum vóru 874 toskar. Harumframt vórðu hýsa, upsi, kalvi, tunga, reyðsprøka, havtaska og hvasskvoysa merkt.

Fiskarar kunnu vinna 12.500 krónur

Endamálið við merkingini er millum annað at fáa betri vitan um, hvussu fiskurin ferðast.

Havstovan heitir tí á fiskarar, sum fáa merktan fisk, um at boða frá og lata fiskin til kanningar.

Fiskarar fáa góðan kiloprís og finningarløn. Harumframt fáa teir lutaseðlar til árliga lutakastið um 12.500 krónur.