Seinastu árini eru fleiri næmingar við útlendskum uppruna komnir í føroyska fólkaskúlan. Serliga er talið av næmingum úr londum uttan fyri Norðurlond og Evropa vaksið.

Tórhallur við Gil, næstformaður í Føroya Lærarafelagi, ávarar um, at skúlarnir ikki kunnu taka nóg væl ímóti næmingunum, um neyðugu tímarnir og pengarnir ikki fylgja við.

– Tað er ein óvirðilig og vónleys støða fyri allar partar, bæði føroysku og útlendsku næmingarnar og lærararnar, skrivar hann.

Fleiri tímar mugu játtast

Nakrir lærarar hava útbúgving í føroyskum sum annaðmál, og í einstøkum skúlum eru móttøkuflokkar settir á stovn. Sambært Lærarafelagnum verða tó ov fáir tímar játtaðir til økið.

Verandi játtan til fólkaskúlan er longu ov lítil. Tí ber ikki til at fíggja undirvísingina við at taka pengar frá øðrum skúlatilboðum.

Góð undirvísing í føroyskum ger tað lættari hjá útlendsku næmingunum at gerast partur av skúladegnum og fóta sær í føroyska samfelagnum.