Føroyskir og grønlendskir ráðgevar vilja samstarva tættari um størri verkætlanir og gagnnýta vitan og royndir hjá hvørjum øðrum.

Hetta kom fram, tá ráðgevar úr báðum londunum hittust í Vinnuhúsinum 5. oktober.

Størri uppgávur í felag

Á fundinum umrøddu ráðgevarnir felags avbjóðingar og møguleikar fyri samstarvi.

Millum evnini vóru nýggjar byggireglugerðir, DGNB-skipanin fyri burðardygt byggjarí, útbjóðingar av ráðgevingaruppgávum og viðgerð hjá myndugleikum.

Ráðgevarnir umrøddu eisini møguleikarnar fyri at samstarva um størri uppgávur í báðum londunum.

Nýggj avtala skal styrkja samstarvið

Fundurin er liður í vaksandi vinnusamstarvinum millum Føroyar og Grønland.

Samstarvið byggir millum annað á eina nýggja avtalu millum Grønlands Erhverv og Vinnuhúsið.

Vinnugreinanevndirnar fyri ráðgevar í báðum londunum síggja góðar møguleikar fyri at styrkja sambandið.

Málið er, at samstarvið við tíðini skal føra til ítøkiligar uppgávur bæði í Føroyum og Grønlandi.