Tá fóru útlánini upp um 170 prosent av BTÚ. Í 2025 var talið bert 74 prosent.

Tað vísir ein nýggj uppgerð frá Landsbanka Føroya, sum staðfestir, at útlánini hjá bankunum ikki longur vaksa skjótari enn føroyski búskapurin.

Í 2025 svaraðu samlaðu útlánini til 74 prosent av bruttotjóðarúrtøkuni (BTÚ).

Støðan er munandi øðrvísi enn undan kreppuni í 1990-árunum og fíggjarkreppuni í 2008.

Tá vuksu útlánini nógv skjótari enn búskapurin. Sambært tølunum hjá Landsbankanum fór lutfallið millum útlán og BTÚ í báðum tíðarskeiðunum upp um 170 prosent.

Sterkar fyritøkur og herd kapitalkrøv

Síðan fíggjarkreppuna í 2008 hava útlánini sum heild ikki vaksið skjótari enn búskapurin.

Landsbankin vísir á tvær møguligar orsøkir.

Onnur er, at føroyskar fyritøkur eru so væl fyri fíggjarliga, at tær hava minni tørv á lánum.

Hin er, at bankarnir mugu seta kapital til síðis fyri at lúka kapitalkrøvini, sum eru herd síðan fíggjarkreppuna.

Landsbankin fylgir neyvt við lutfallinum millum útlán og BTÚ, tí tað er eitt týdningarmikið mát fyri fíggjarliga støðufestið.