Útlánini hjá føroysku bankunum eru vaksin við 1,4 milliardum krónum eftir einum ári. Í august 2026 høvdu bankarnir lánt føroyskum kundum tilsamans 22,2 milliardir krónur, samanborið við 20,8 milliardir krónur sama mánað í fjør.

Tað vísa nýggj tøl frá Landsbanka Føroya.

Hóast útlánini framvegis vaksa nógv, er ferðin minkað. Árligi útlánsvøksturin var 6,4 prosent í august, roknað sum eitt tríggja mánaða miðaltal. Vøksturin hevur verið minkandi síðani árslok 2025.

Húsarhaldini økt skuldina við 1,1 milliard

Tað eru serliga húsarhaldini, sum standa fyri stóra vøkstrinum í útlánunum.

Í august skyldaðu føroysku húsarhaldini bankunum 12,4 milliardir krónur. Tað eru 1,1 milliard krónur meira enn sama mánað í fjør, tá skuldin var 11,3 milliardir krónur.

Árligi útlánsvøksturin til húsarhaldini var 9,2 prosent.

Húsarhaldini læna fyrst og fremst pengar til bústaðir. Tey hava eisini lán hjá donskum realkredittstovnum, men vøksturin í hesum lánum er minkandi.

Privata vinnan skyldar 7,2 milliardir

Føroyska vinnulívið hevur eisini økt lántøkuna munandi.

Privata vinnan skyldaði í august føroysku peningastovnunum 7,2 milliardir krónur. Tað eru 500 milliónir krónur meira enn fyri einum ári síðani.

Árligi útlánsvøksturin til privatu vinnuna var 7,7 prosent.

Útlánsvøksturin til vinnuna tók dik á seg á vári 2025, men hevur verið minkandi síðani á vári 2026.

Tølini frá Landsbankanum vísa sostatt, at bæði húsarhald og vinna framvegis økja lántøkuna, hóast útlánsvøksturin er farin at hæsa av.