Tann 8. apríl 2027 fer Fríða Saiya at hava konsert í Lille VEGA í Keypmannahavn. Konsertin verður eftir eitt hendingaríkt fyrsta ár, har unga songkvinnan hevur gjørt vart við seg við sínum persónligu sangum og nútímans popptónleiki.
Í august gav hon út sína fyrstu EP, [‘fryi:ja ‘sai:ja], sum hevur fingið heiti eftir donsku úttaluni av navni hennara.
Dreymar, ivi og stórar kenslur
Á útgávuni viðger Fríða Saiya samleika, broytingar í lívinum og kensluna av ikki at vera nóg góð.
– EP'in snýr seg um broytingar. Um at fara frá einari útgávu av sær sjálvum til eina aðra og um kensluna av ikki at vera nóg góð, sum kann fylgja við, greiðir hon frá.
Hon sigur, at dreymar og markið millum veruleika og undirvitsku geva henni nógvan íblástur. Fleiri av sangunum eru skrivaðir um kvøldið ella náttina.
Sangurin Min Egen Værste Ven er eitt av høvuðsløgunum á útgávuni. Við synthesizarum, violin, gittarum og trummum lýsir hann sjálviva og óvissu, tá lívið broytist.
Fekk rós fyri framførslu
Fríða Saiya hevur longu fingið spælitíð á donsku útvarpsrásini P3.
Hon hevur eisini fingið góð ummæli fyri sínar framførslur. Eftir eina konsert á festivalinum Blinkende Lygter í Kødbyen í Keypmannahavn rósti danski tónleikamiðilin Soundvenue henni fyri at megna at bergtaka áhoyrararnar við bert einum gittarleikara aftur at sær.
Konsertin í Lille VEGA verður hósdagin 8. apríl klokkan 21.
