Steinarnir, sum hvør vigar umleið tvey tons, vórðu sleptir úr Greenpeace-skipinum Arctic Sunrise umleið 50 kilometrar eystan fyri Great Yarmouth í Onglandi um vikuskiftið.
Sambært BBC hevði Greenpeace ikki fingið loyvi til átakið.
Greenpeace sigur, at átakið í roynd og veru hevur steðgað troling á einum 116 ferkilometrar stórum øki í verndarøkinum Southern North Sea.
Felagsskapurin heldur, at botntroling skaðar havumhvørvið og kann minka um føðina hjá nísum. Eisini kann óljóð frá troling órógva nísurnar, tá tær leita eftir føði.
Sambært Greenpeace var átakið seinasti útvegur, tí myndugleikarnir hava verið alt ov seinir at verja havøkini.
Bretskir myndugleikar ávara
Bretska umhvørvismálaráðið, Defra, undirstrikar, at alt virksemi á sjónum skal vera í samsvari við lógina og taka atlit at trygdini hjá øðrum sjófarandi.
Greenpeace sigur seg hava boðað myndugleikunum frá, hvar steinarnir liggja á havbotninum. Bretski havmyndugleikin Marine Management Organisation (MMO) hevur síðani almannakunngjørt neyvu staðsetingarnar.
Hetta er ikki fyrstu ferð, at Greenpeace fremur eitt slíkt átak. Í 2022 søkti felagsskapurin 18 stórar steinar niður á havbotnin út fyri Cornwall.
Tá átalaði MMO framferðina og metti hvørki, at átakið var rættvísgerligt, ella at tað fór at bøta um havumhvørvið.
