Jólaklassikarin Tá Grinsj stjól jólini! er nú komin út á føroyskum fyri fyrstu ferð. Edvin H. Niclasen hevur týtt kendu barnabókina, sum Dr. Seuss skrivaði í 1957.

Á Facebook greiðir Edvin H. Niclasen frá, at týðingararbeiðið hevur verið bæði drúgt og trupult.

– Mann vil jú halda seg til rímini og rútmuna hjá honum, samstundis sum at tað skal vera gott føroyskt mál OG relativt lætt hjá børnum at skilja, skrivar hann.

Viðhvørt ivaðist hann í, um tað yvirhøvur bar til.

– So var tað tíðum, at eg hugsaði, at hetta er ógjørligt? Tað kanst tú ætla!

Við hjálp frá Bókadeild Føroya Lærarafelags og vinfólki er týðingin loksins komin á mál.

Bókin er innbundin, myndprýdd og ætlað børnum í aldrinum trý til níggju ár.

Søgan um Grinsj, sum stjól jólini, hevur verið ein væl dámdur jólaklassikari síðan 1957.