Í fjør høvdu føroyingar tilsamans yvir 10 milliardir í nettoogn uttanlands. Tað vísir ein nýggj uppgerð hjá Hagstovuni og her er bæði talan um alt tað almenna og alt tað privata.

Uppgerð av ogn og skuld vísir, hvat føroyingar eiga og skylda uttanlands og nettoognin er munurin ímillum ogn og skuld.

Ognirnar uttanlands er vaksnar góðar 2,3 milliardir krónum men hinvegin er uttanlandaskuldin minkað góðar 3,1 milliard krónur. Sostatt vaks nettoogn føroyinga uttanlands meira enn 5,4 milliardir í fjør.

Ognirnar hjá føroyingum uttanlands vuksu 2,3 milliardir, úr 47,4 milliardum upp í næstan 50 milliardir. Hagstovan sigur, at tað eru fíggjarlig feløg sum eiga størsta partin av hesum vøkstri. 

Uttanlandsskuldin minkaði 3,1 milliard, úr 42,7 milliardum niður í 39,6 milliardir. Hetta komst serliga av, at ikki-fíggjarlig feløg minkaðu um sína skuld stívliga 2,3 milliardir krónur. 

Fíggjar- og tryggingarfyritøkurnar hava økt um nettoognina meira enn hálva aðru milliard krónur, tí ognin er vaksin, og skuldin er minkað. Ikki-fíggjarlig feløg hava minkað nettoskuldina yvir 2,7 milliardir og nú er nettoskuldin tann sama sum hon var í 2023.

Meira enn helvtin av ogn føroyinga uttanlands er í virðisbrøvum. Tó stavar vøksturin í ognum uttanlands frá størri beinleiðis íløgum og tað útlendingar eiga í Føroyum.