Jarðfeingi hevur gjørt Gróthúsini á Debesartrøð, har fyrisitingin hjá Fróðskaparsetri Føroya heldur til, til royndarstøð fyri jarðhita.

Endamálið er at fáa greiðari svar um, hvussu føroyska bergið leiðir hita, hvussu vatn flytur seg í undirgrundini, og hvussu ymiskir borihættir ávirka úrslitið.

Trý royndarhol borað

Undir leiðslu av Janu Ólavsdóttir, verkætlanarleiðara á Jarðfeingi, eru trý jarðhol borað. Eitt er 400 metrar djúpt, og hini bæði eru 200 metrar.

Holini eru borað á ymiskan hátt, so granskarar kunnu samanbera ymiskar loysnir. Eitt teirra er millum annað stoypt fyri at kanna, hvørja ávirkan tað hevur.

Tól og hitamátarar í holunum skráseta hitan fyri hvørjar tíggju metrar tíggjunda hvørt minutt.

Dátur skulu savnast í fleiri ár

Royndarstøðin skal gera tað lættari at velja røttu jarðhitaloysnina, áðrenn borað verður.

Dátur skulu savnast í fleiri ár og verða grundarlag undir framtíðar gransking og menning av jarðhita í Føroyum.

Verkætlanin er stuðlað av Jarðfeingi, Heilsu- og orkumálaráðnum, Vinnumálaráðnum og Landsverki.