Johnny í Grótinum verður millum røðararnar á ráðstevnuni Víðari enn BTÚ, sum verður í Norðurlandahúsinum týsdagin 29. september.

Í fyrilestrinum Meira enn BTÚ í føroyskum høpi fer formaðurin í Búskaparráðnum at seta sjóneykuna á samanhangin millum búskap, vælferð og fíggjarpolitiskt haldføri.

Við støði í nýggju haldførisgreiningini fer Johnny í Grótinum millum annað at viðgera, hvussu fíggjarlig, sosial og umhvørvislig atlit kunnu hugsast saman.

Eisini verður hugt at, hvussu politiskar avgerðir kunnu ávirka ymisk ættarlið, hvør ber fíggjarligu byrðarnar, og hvør fær ágóðan.

Endamálið er at seta sjóneykuna á, hvussu menningin í føroyska samfelagnum kann metast út frá øðrum viðurskiftum enn bert bruttotjóðarúrtøkuni, BTÚ.

Ráðstevnan verður í Norðurlandahúsinum 29. september frá klokkan 9 til 12.30. Eisini verður møguligt at fylgja við á netinum.

Tiltakið er ókeypis, men neyðugt er at melda seg til frammanundan.

Betri-samtakið er høvuðsstuðul hjá ráðstevnuni.