– So havi eg vitjað svimji- og vælveruhøllina í Runavík.
Soleiðis skrivar Kaj Leo Holm Johannesen á Facebook, har ið hann serliga rósar atgongdini hjá koyristólsbrúkarum.
– Eg var hugtikin av svimjihøllini. Eg havi hug at fara at svimja aftur. Hon er gjørd til okkum koyristólsbrúkarar við einari atgongd, sum var til "UG" til mín, skrivar hann.
Atgongdin fær rós
Nýggja svimjihøllin er partur av ítróttardeplinum Bylgjuni í Runavík.
Høllin er sniðgivin við serligum atliti at góðari atgongd fyri øll – eisini fólk við rørslutarni, børn og eldri.
Har eru millum annað breiðar gongir og rúmlig umklæðingarrúm, sum eru lagað til fólk við rørslutarni. Eisini er pláss fyri hjálpartólum og hjálparfólki, um tørvur er á tí.
Vil aftur í hylin
Vitjanin hevur eisini givið Kaj Leo Holm Johannesen hug at fara at svimja aftur. Samstundis takkar hann borgarstjóranum og býráðnum fyri íløguna.
Svimjihøllin hevur tríggjar hyljar: ein 25 metrar langan svimjihyl við átta geilum, ein barnahyl og ein heitan hyl í vælveruøkinum.
