Kanada letur nú munandi meira upp fyri fiskiskapi eftir toski við Newfoundland og Labrador. Samlaða loyvda veiðan hækkar í 2026 úr 38.000 upp í 59.000 tons. Tað er ein vøkstur á 55 prosent.

Avgerðin er tikin, eftir at nýggjasta vísindaliga ráðgevingin vísir, at stovnurin er komin fyri seg. Tað er fyrstu ferð síðan veiðubannið í 1992, at norðurtoskurin er mettur at vera í góðum standi.

Størri fiskiskapur

Tann flotin, ið fiskar tættast við land, fær framvegis størsta partin av kvotuni. Hann fær 70 prosent, svarandi til 41.300 tons. Hin parturin av kanadiska flotanum fær 20 prosent, ella 11.806 tons, meðan upprunafólk og serligar tillutanir fáa 10 prosent, svarandi til 5.895 tons.

Joanne Thompson, fiskimálaráðharri, sigur, at hækkingin er úrslit av vísindaligari umsiting og samrøðum við fiskimenn, upprunafólk, myndugleikar í landslutinum og vinnuna.