Kina er á veg móti nýggjum meti í handilsavlopi. Fyrstu tíggju mánaðirnar í ár hevur landið útflutt vørur fyri 1.040 milliardir dollarar (umleið 6,96 billiónir danskar krónur) meira, enn tað hevur innflutt.

Tað vísa nýggj tøl frá kinesku tollmyndugleikunum, sambært CNN.

Hetta er annað árið á rað, at handilsavlopið fer upp um 1.000 milliardir dollarar. Í ár varð markið rokkið ein mánað fyrr enn í 2025.

Vitlíki gevur útflutninginum viðvind

Altjóða kappingin um vitlíki (AI) hevur økt eftirspurningin eftir kineskari hátøkniútgerð.

Í oktober vaks kineski útflutningurin 35,2 prosent samanborið við sama mánað í fjør. Búskaparfrøðingar høvdu væntað ein vøkstur upp á 33,5 prosent.

Innflutningurin vaks samstundis 41,6 prosent.

Men hóast stóra vøksturin í útflutninginum er heimamarknaðurin framvegis veikur.

Kinesiskir brúkarar halda aftur við at brúka pengar, samstundis sum bústaðarmarknaðurin framvegis er í kreppu. Bilasølan í Kina minkaði í oktober fyri tólvta mánað á rað, meðan útflutningurin av bilum helt fram at vaksa.

Vandi fyri nýggjum handilsstríði

Stóra handilsavlopið kann elva til nýggjar ósemjur við ES og USA.

Evropeiskir leiðarar hava longu kravt fleiri avmarkingar á innflutning úr Kina.

Búskaparfrøðingurin Joe Peissel hjá Trivium China ávarar samstundis um, at vandin fyri nýggjum tollgjøldum og øðrum handilsforðingum verður stórur í 2027.

Kina og USA hava fyribils longt vápnahvíldina í handilsstríðnum við tveimum mánaðum.

Í næstu viku væntast Xi Jinping og Donald Trump at hittast í Shenzhen.