Kunoyar kommuna samtykti einmælt á bygdaráðsfundi tann 21. mai 2025, at áseta tænastugjald á tóm býli, sum skuldi koma í gildi frá 1. juli 2026.
Tænastugjaldið var ásett til 7.945 krónur um árið fyri hvørt býli, svarandi til umleið 663 krónur um mánaðin, og verður endurskoðað á hvørjum ári.
Ásetingin byggir á nýggja lógarheimild, sum gevur kommunum møguleika at krevja gjald fyri býli, har eingin er skrásettur at búgva sambært Landsfólkayvirlitinum, men har kommunan kortini veitir grundleggjandi tænastur.
Talan er serliga um:
* vatnveiting
* frárenning og kloakkskipan
* burturbeining og handfaring av húsarhaldsburturkasti
* brunatilbúgving
Lógin ásetur, at um kommunan brúkar hesa heimild, skal gjaldið fevna um øll tóm býli í kommununi, óansæð um eigarin sjálvur býr í kommununi ella ikki.
Sambært útrokningum hjá kommununi er miðal rakstrarkostnaðurin fyri hesar tænastur mettur til 12.658 krónur um árið fyri hvørt býli, grundað á miðal tøl frá 2020–2024.
Gjaldið varð tí ásett soleiðis, at tað partvís dekkar hesar útreiðslur og liggur á lógarásettum hámarki fyri 2026.
Eitt býli verður í hesum høpi skilmarkað sum hús, íbúð ella líknandi, sum er egnað til bústað og hevur innlagt vatn og kloakk.
Býli fevnir millum annað um:
* vanlig sethús
* tvíhús og raðhús
* íbúðir í blokkum
* íbúðir í vinnubygningum og á neystaloftum
Smærri bygningar sum úthús, bilhús og hjallar eru ikki fevndir. Íbúðir, har eigarin sjálvur býr og sum ikki eru sjálvstøðugt matrikuleraðar, eru eisini undantiknar skipanini.
Í fíggjarætlanini fyri 2026 varð mett, at skipanin kundi geva kommununi inntøkur á umleið 170.000 krónur. Endamálið var at tryggja eina javnari býti av útreiðslunum fyri grundleggjandi tænastur millum allar bústaðir í kommununi.
Tænastugjaldið kom í gildi 1. juli 2026, og kommunan avger, um gjaldið verður kravt inn mánaðarliga, hálvárliga ella árliga.
Eigarar av tómum býlum hava fingið nærri kunning um innkrevjing og gjaldstreytir.
