Viðlíkahaldseftirsleipið á føroyska vegakervinum er nú farið upp um 500 mió. kr. Samstundis eru umleið 30 brýr í so ringum standi, at neyðugt er at gera ábøtur innan stutta tíð.

Tað stendur í uppskotinum til fíggjarlóg fyri 2027.

Landsverk hevur í nógv ár víst á, at játtanin til viðlíkahald er ov lítil. Sambært uppskotinum er játtanin minkað, hóast kostnaðarstøðið er hækkað, nýggir landsvegir eru komnir afturat, og ferðslan er vaksin.

30 brýr krevja ábøtur

Ein støðulýsing frá 2018 vísti, at 32 brýr vóru í so ringum standi, at ábøtur máttu gerast beinanvegin. Fleiri teirra eru síðani umvældar.

Men ein nýggj støðulýsing frá 2024 vísir, at umleið 30 brýr framvegis eru í ringum standi. Tær hava støðumeting 4. Tað merkir, at bygningslutirnir eru nógv niðurbrotnir, og at neyðugt er við viðlíkahaldi innan stutta tíð.

Fleiri aðrar brýr eru eisini á veg í somu støðu, verða tær ikki umvældar. 

13 milliónir til brýr og tunlar

Í løguætlanini fyri 2027 eru 13 mió. kr. settar av til dagføring av brúm og tunlum.

Til samanberingar verður samlaða eftirsleipið á vegum, tunlum, brýgvum og øðrum undirstøðukervi fyribils mett til meira enn 500 mió. kr.