Føroyska Nema ætlar sær ein størri bita av grønlendska KT-marknaðinum. Við stórum fyritøkum sum Royal Greenland og Nuuk Transport á kundalistanum tekur Nema nú næsta stigið og fær egna støð í Nuuk. Málið er at fáa fatur á enn fleiri grønlendskum kundum.
Tað kemur fram í einari lýsingagrein í grønlendska miðlinum Sermitsiaq.
Stórar fyritøkur á kundalistanum
Nema hevur í fleiri ár selt KT-skipanir til grønlendskar fyritøkur. Millum kundarnar eru Royal Greenland og Nuuk Transport.
Sambært Nema er eftirspurningurin eftir talgildum loysnum í Grønlandi vaksandi.
– Vit síggja stórar møguleikar í Grønlandi og gleða okkum til at byggja víðari á tað, vit longu hava skapt, sigur Gudny Langgaard, stjóri í Nema.
Føroyskur maður fær ábyrgdina
Heini Hansen fær ábyrgd av kundasambondunum í Grønlandi. Hann hevur longu í fleiri ár arbeitt við grønlendsku kundunum hjá Nema.
Nýggja støðin í Nuuk verður skipað í samstarvi við Arctic Print, sum útvegar Nema høli og bústað.
Nema veitir skipanir til millum annað lønir, bókhald, starvsfólkaumsiting og tímaskráseting.
