Ein álvarslig gøla hevur rakt amerikanska tøknirisan Nvidia. Stjórin og ein av stovnarunum, 63 ára gamli Jensen Huang, hevur viðgingið at hava verið konu síni ótrúgvur. Samstundis hevur Nvidia sett eina óhefta kanning í verk, eftir at illgruni er reistur um samband hansara við eina kvinnu, sum amerikanskir myndugleikar sambært miðlum gruna fyri at njósnast fyri Kina.
Málið kann fáa stórar avleiðingar fyri eina av heimsins mest virðismiklu fyritøkum, sum hevur ein avgerandi leiklut í menningini av vitlíki.
Viðurkennir ótrúskap og biður um umbering
Í eini fráboðan til starvsfólkini viðgongur Jensen Huang, at hann hevur verið konu síni ótrúgvur og sært bæði hana og børnini.
– Eg taki fulla ábyrgd av tí, eg havi gjørt, og pínuni, eg havi elvt til. Eg góðtaki eisini atfinningarnar, sum fylgja við, sigur Huang sambært CNN.
Hann stuðlar kanningini hjá Nvidia og sigur seg vilja verja fyritøkuna og amerikanska tjóðartrygd.
Huang hevur ikki upplýst, hvør kvinnan er.
Kvinna undir illgruna fyri njósning
Málið snýr seg um sambandið millum Jensen Huang og Alice Huang, sum áður var stjóri í tøknifyritøkuni Megaspeed í Singapore.
Sambært amerikanskum miðlum gruna amerikanskir myndugleikar hana fyri at hava latið Kina loyniligar upplýsingar og hjálpt til við at smugla framkomnar teldubrikkur til landið.
Einki er tó prógvað, og Nvidia hevur áður víst aftur, at ólóglig útflýggjan av teldubrikkum hevur verið staðfest.
Nevndin í Nvidia boðaði sunnudagin frá, at óheftir nevndarlimir og uttanhýsis løgfrøðingar skulu standa fyri kanningini.
Nevndin sigur seg fyribils onga orsøk hava til at halda, at amerikansk tjóðartrygd ella loyniligar upplýsingar hjá Nvidia eru settar í vanda.
Trump verjir stjóran – Kina vísir ákærunum aftur
Amerikanski forsetin, Donald Trump, hevur eisini gjørt viðmerkingar til málið.
– Eg haldi, at hann er ein heiðurligur maður, segði Trump sunnudagin sambært CNN.
Kinesiska uttanríkisráðið vísir samstundis staðiliga aftur, at Alice Huang hevur njósnast fyri Kina.
Talsmaðurin Guo Jiakun sigur, at ákærurnar byggja á grundarleysar gitingar og hava til endamáls at seta Kina í ringt ljós.
Óvissa um framtíðina hjá Nvidia
Málið kemur á einum viðkvomum tíðspunkti fyri Nvidia, sum er millum heimsins størstu fyritøkur og hevur ein týðandi leiklut í altjóða kappingini um vitlíki.
Partabrævið hjá Nvidia fall í virði í handlinum undan børsupplatingini mánadagin, skrivar BBC.
Samstundis verður spurningurin reistur, um Jensen Huang kann halda fram sum stjóri.
Nvidia undirstrikar tó, at Huang heldur fram í stjórastarvinum sum áður.
