Nýggjar serreglur á almannaøkinum skulu gera tað lættari hjá ukrainum, sum eru flýddir undan krígnum, at fáa fíggjarligan stuðul og koma út á arbeiðsmarknaðin í Føroyum.

Margit Stórá, landsstýriskvinna í almanna- og bústaðamálum, hevur undirskrivað kunngerðina, sum varð kunngjørd 4. november og kom í gildi dagin eftir.

Rætt til barnagjald og uppihaldsveiting

Ein týðandi broyting er, at burturriknir ukrainar ikki longur skulu lúka treytina um danskan heimarætt fyri at fáa barnagjald til einsamallar uppihaldarar.

Samstundis kunnu ukrainar fáa fyribils uppihaldsveiting sum einsamøll, hóast tey búgva saman við øðrum. Treytin er, at tey ikki búgva saman við familju ella sambúgva.

Undirvísing í føroyskum sum annaðmál verður eisini roknað sum eitt styttri arbeiðsrættað skeið. Hetta gevur rætt til uppihaldsveiting sambært galdandi reglum.

Fleiri møguleikar at koma í arbeiði

Almannaverkið fær eisini heimild til at bjóða burturriknum ukrainum virknisvenjing, stuðul til arbeiðsbúgving og leiðbeinara.

Harumframt kunnu ukrainar fáa fyribils uppihaldsveiting, meðan teir luttaka í arbeiðsfremjandi tiltøkum.

Nýggju reglurnar fevna um ukrainar, sum hava fyribils uppihaldsloyvi í Føroyum sambært serlóggávuni fyri fólk, ið eru rikin úr Ukraina.

Kunngerðin byggir á løgtingslógina frá 1. juni 2026 um bráðfeingis bústaðir og serreglur á almannaøkinum fyri burturriknar ukrainar.