Upplesarar hava nú eisini rætt til bókasavnsgjald sambært nýggju reglunum um býtið av gjaldinum. Samstundis boðar Landsbókasavnið frá, at nýggir móttakarar skulu søkja í seinasta lagi 1. oktober 2026.
Bókasavnsgjaldið er samsýning frá landinum til føroyskar høvundar fyri, at bøkur, ljóðbøkur, e-bøkur og listaverk teirra eru tøk á føroyskum bókasøvnum.
Verk frá 2025 verða tikin við
Í ár verða verk, sum vórðu givin út í 2025, tikin við í skipanina. Nýggir móttakarar skulu senda eitt serligt umsóknarblað til Landsbókasavnið.
Skipanin fevnir um rithøvundar, tónaskøld, týðarar, upplesarar, myndlistafólk og fotografar, sum búgva í Føroyum ella uttanlands og á ymiskan hátt hava virkað við føroyskum bókum.
