Landsverk bjóðar fyri Almanna- og bústaðamálaráðið nýtt sambýli í Miðvági út í heildararbeiðstøku. Sambýlið, sum fer at eita Sambýlið í Birtulíð, skal eftir ætlan standa liðugt og vera klárt at taka í nýtslu í 2029.

12 íbúðir í tveimum búeindum

Verkætlanin fevnir um verkætlanargerð og bygging av einum sambýli við 12 íbúðum. Íbúðirnar verða býttar í tvær búeindir við seks íbúðum í hvørjari.

Harumframt skulu felagsøki, starvsfólkaøki og uttanumøki gerast.

Endamálið er at skapa tryggar, heimligar og virðiligar karmar um gerandislívið hjá fólki við sálarligum og sosialum avbjóðingum.

Tilboð skulu latast inn í oktober

Bygningurin skal hava ein heimligan og hugnaligan dám. Tað skal síggjast aftur í sniði, rúmskipan, tilfari, litum, ljósi og sambandinum millum inni- og uttanduraøki.

Byggiøkið liggur nærindis rundkoyringini í Miðvági og varð gjørt byggibúgvið fyrr í ár.

Tilboðini skulu latast inn 7. oktober 2026. Eftir tað verða tilboðini mett, heildararbeiðstakari valdur, og málið fer síðani til politiska viðgerð.