Landsstovnar, sum brúka tíðarskrásetingarskipanirnar Nema Tíð og Totalview, kunnu nú fáa tær fyri lægri prís. Gjaldstovan hevur gjørt nýggjar avsláttaravtalur við føroysku KT-fyritøkurnar Nema og Formula.

Tað er Keyp landsins hjá Gjaldstovuni, sum hevur fingið avtalurnar í lag. Endamálið er at tryggja landsstovnum betri prísir á skipanum, sum teir longu brúka ella ætla at keypa.

Gjaldstovan upplýsir tó ikki, hvussu stórur avslátturin er.

Stovnarnir kunnu sjálvir velja

Avtalurnar eru eitt tilboð til allar landsstovnar, men eingin stovnur hevur skyldu at nýta tær.

Stovnarnir kunnu framvegis velja aðrar skipanir ella royna at samráðast um enn betri prísir.

Gjaldstovan heitir samstundis á stovnar, sum longu brúka Nema Tíð ella Totalview, um at tryggja sær nýggju avsláttarprísirnar.

Fer eitt keyp upp um 50.000 krónur, skulu stovnarnir biðja í minsta lagi tveir veitarar um tilboð. Fer keypið upp um 500.000 krónur, skal tað bjóðast út.

Fleiri avsláttaravtalur eru á veg

Avtalurnar við Nema og Formula eru partur av einum nýggjum arbeiðshátti hjá Keypi landsins.

Ætlanin er at gera fleiri líknandi avtalur um vørur og tænastur, sum eru torførar at bjóða út ella fáa kapping um.

Gjaldstovan upplýsir, at miðað verður eftir at fáa fleiri avsláttaravtalur í lag í næstum.