Ætlanin hjá Donald Trump, forseta, um at innflyta russiska dieselolju til USA er komin í álvarsligar trupulleikar. Tvey tangaskip, sum upprunaliga høvdu kós móti USA, hava broytt kós, samstundis sum amerikanskir myndugleikar ávara um rættarligar avleiðingar.

Tað skrivar tíðindastovan AP.

Tangaskip broyta kós

Trump og russiski forsetin, Vladimir Putin, kunngjørdu 9. oktober eina avtalu um at fáa meira enn 300.000 tons av russiskari dieselolju út á amerikanska og altjóða marknaðin.

Men enn er eingin veiting av russiskari dieselolju sambært avtaluni staðfest í USA.

Tangaskipini Talisman og Leruo, sum fóru úr russisku havnini Primorsk í oktober, høvdu upprunaliga kós móti eysturstrondini í USA.

Nú hevur annað skipið sett kós móti Brasil, meðan hitt er á veg inn í Miðjarðarhavið.

Eitt triðja tangaskip er framvegis á veg móti USA, men hevur strikað New York sum ásetta komuhavn.

Politisk mótstøða hóttir avtaluna

Mikie Sherrill, guvernørur í New Jersey, hevur ávarað havnir og oljufyritøkur í statinum ímóti at taka ímóti russisku oljuni.

Hon heldur, at stjórnin hjá Trump ikki hevur heimild at seta innflutningsbannið frá 2022 til viks.

Eisini hava senatorar úr báðum stóru amerikansku flokkunum kravt, at avtalan verður ógildað.

Amerikanska fíggjarmálaráðið heldur hinvegin fast við, at undantaksloyvið til innflutningin er lógligt.

Sambært greinarum er óvist, um russiska dieseloljan yvirhøvur hevur keyparar í USA.

Óvissan um avtaluna kemur samstundis, sum dieselprísirnir í USA hava sett met í sambandi við kríggið millum USA og Iran.