Nú klokkan 17.15 var fyrsta bríksl á Dungasandi í Sørvági, har KÍ er gestur hjá 07 Vestur.
Sæð við landsliðsbrillum er tað áhugavert at staðfesta, at René Shaki Joensen ikki er millum teir fyrstu ellivu hjá KÍ. René Shaki Joensen er heldur ikki á beinkinum, og sum tað skilst úr KÍ leguni, so hevur hann givið avboð at vera við í landsliðshópinum hesa ferð.
Eyðun Klakstein landsliðsvenjari fer fyrrapartin í morgin at boða frá hvørjar 23 hann fer at boðsenda at vera við í teimum fýra Nations League dystunum, sum vera síðst í hesum mánaðinum og fyrst í næsta mánað.
Sum tað sær út til verður tað neyðugt hjá landsliðsvenjaranum at finna nýggjar miðvallarspælarar, tí fleiri av teimum, sum plaga at vera á miðvøllinum, eru ikki tøkir.
Tríggir av teimum, sum ikki eru tøkir, eru Brandur H. Olsen, Jákup B. Andreasen og Noah Mnenéy, ið eru langtíðarskaddir, og so er spurningurin, um Hallur Hansson er nóg væl fyri at spæla á landsliðnum. Í dag er hann millum teir fyrstu ellivu hjá KÍ í Sørvági.
Á positivu síðuni er tað hugaligt at staðfesta, at miðvallarin Géza Dávid Turi er ógvuliga væl upplagdur í Grimsby, har hann aftur og aftur verður kosin at vera besti maður, og í gjár skoraði hann við framúr langskoti.
Millum møguligar nýggjar miðvallarar, sum kanska fara at fáa landsliðsboð í morgin, verða nevndir Emil Weihe Joensen hjá oddaliðnum NSÍ, sum hevur verið rættiliga eyðsýndur, og Mattias Hellisdal, sum í fjør flutti úr B36 og til Svøríkis, har hann nú spælir við Västerås í bestu deildini, sum eitur Allsvenskan. Tað kann eisini vera, at HB vongverjin Ási P. Dam fer at fáa landsliðsboð. Nú tað leingi hevur gingið heilt væl hjá HB, hevur Ási P. Dam verið sera væl upplagdur.
Landsliðsvenjarin er í kvøld í Runavík og hyggur at dystinum millum NSÍ og Víking.
Tað verður tíðindafundur í FSF húsinum í morgin klokkan 10. Tá fara Eyðun Klakstein landsliðsvenjari og Ólavur Mikkelsen U-21 landsliðsvenjari at kunngera, hvørjir spælarar fara at fáa landsliðsboð.
