Sands kommuna og Sandoy Hálvmarathon hava gjørt avtalu um, at kommunan rindar luttøkugjaldið fyri allar sínar borgarar.
Avtalan fevnir um hálvmarathon á 21,1 kilometrar, teinin úr Søltuvík á 10,9 kilometrar og teinin runt Sandsvatn á 6,8 kilometrar.
Yvir 400 luttakarar í ár
Sandoy Hálvmarathon verður 15. mai 2027. Endamálið við tiltakinum er at savna fólk til rørslu, hugna og sosiala samveru.
Í ár vóru fleiri enn 400 luttakarar. Harumframt komu umleið 400 gestir til hugnaligu tiltøkini við málið.
Kommunan er eisini høvuðsstuðul
Sands kommuna er eisini ein av høvuðsstuðlunum hjá Sandoy Hálvmarathon.
Við nýggju avtaluni fáa allir borgarar í kommununi møguleika at velja millum tríggjar ymiskar teinar uttan at rinda luttøkugjald.
