Minst 12 fólk eru deyð, og 23 eru framvegis saknað eftir ein ógvisligan skógareld nærindis Almería í Suðurspania.
Myndugleikarnir halda, at flestu – møguliga øll – ofrini eru útlendingar. Fýra teirra vóru í einum høgrastýrdum bili og verða hildin at hava verið bretar.
Rýmingarleiðin gjørdist ein deyðsfella
Sambært myndugleikunum fóru fleiri av ofrunum av ásettu rýmingarleiðini. Tey royndu í staðin at sleppa undan eldinum gjøgnum eina á, men eldurin fekk tey aftur.
Sjey fólk doyðu, meðan tey royndu at flýggja til gongu. Fleiri onnur vórðu løstað, teirra millum fólk við álvarsligum brunasárum.
800 fólk flutt á tryggari stað
Umleið 500 sløkkiliðsfólk stríðast móti eldinum. Hernaðarliga tilbúgvingardeildin í Spania tekur eisini lut í arbeiðinum.
Umleið 800 fólk eru flutt á tryggari stað, og nærum 200 eru í fyribils skýlum. Eldurin hevur lagt umleið 3.150 hektarar av skógi og landbúnaðarjørð í oyði.
