Ein belgisk kvinna hevur fingið útferðarbann í Íslandi í sambandi við eitt stórt mál um smugling av umleið 70 kilo av rúsevnum við Norrönu. Tað skrivar íslendska kringvarpið RÚV.
Kvinnan varð útflýggjað úr Belgia til Íslands 17. august. Útferðarbannið er galdandi til 27. november. Løgreglan er liðug við kanningararbeiðið, og málið er nú latið íslendska ákæruvaldinum.
Umleið 70 kilo av rúsevnum
Rúsevnini vórðu funnin í juni í einum húsbili, sum var komið til Íslands við Norröna.
Haldið fevndi um 56 kilo av amfetamini, átta kilo av kokaini, trý kilo av ketamini, eitt kilo av krystallinskari metamfetamini og eitt kilo av sokallaðum „pink kokaini“.
Sokallaða „pink kokainið“ var ein blanding av ketamini og MDMA.
Íslendska kringvarpið RÚV lýsir haldið sum eitt av teimum stóru rúsevnismálunum í Íslandi.
Løgreglan fylgdi parinum
Ein belgiskur maður í sekstiárunum hevur sitið varðhaldsfongslaður síðani juni.
Sambært RÚV komu kvinnan og maðurin saman til Íslands. Løgreglan valdi tó í fyrstu syftu ikki at handtaka tey, men valdi heldur at fylgja teimum og hava eftirlit við ferð teirra.
Løgreglan fylgdi parinum úr Seyðisfirði til flogvøllin í Egilsstaðum, har maðurin setti kvinnuna av. Haðani skuldi hon flúgva til Reykjavíkar.
Maðurin varð seinni handtikin á einum kampingplássi í Norðuríslandi. Tá løgreglan legði uppí, var hann farin at grava eitt hol. Løgreglan kannaði, um ætlan hansara var at fjala rúsevni har.
