Amerikanski forsetin Donald Trump heldur fast við, at ein friðaravtala millum Russland og Ukraina er nær. Tað sigur hann í samrøðu við CBS News, eftir at Republikanski flokkurin misti meirilutan í bæði Umboðsmannatinginum og Senatinum á miðvalinum í USA.
Í samrøðuni við 60 Minutes sigur Trump, at landamørkini hjá Ukraina helst verða broytt sum partur av einari friðaravtalu.
– Eg haldi, at vit fáa eina avtalu í lag, og at Ukraina fer at fáa eitt nakað øðrvísi skap, sigur Trump.
Trump vil ikki siga, hvørjum hann lítur mest á
Samrøðan varð gjørd fáar dagar undan ætlaðum friðarsamráðingum millum Ukraina, Russland og USA í Abu Dhabi. Hetta verða fyrstu slíku samráðingarnar síðan februar.
Trump heldur, at persónliga ósemjan millum Volodymyr Zelenskyj og Vladimir Putin er størsta forðingin fyri friði.
Spurdur, hvørjum av teimum báðum hann lítur mest á, svarar Trump:
– Tað vil eg helst ikki siga. Men eg havi gott samband við báðar.
Hann leggur afturat, at kríggið skjótt fer at enda, og at tað verður honum sjálvum fyri at takka.
Stórur valósigur broytir politisku støðuna
Republikanararnir mistu meirilutan í báðum deildum í Kongressini og taptu harumframt týðandi val í fleiri statum, har flokkurin vanliga stendur sterkur.
Trump ásannar, at flokkurin ikki megnaði at fáa boðskapin fram, men vísir eisini á, at hann sjálvur ikki var á atkvøðuseðlinum.
Ósigurin gevur Demokratunum størri møguleikar at kanna virksemið hjá stjórnini og seta mørk fyri politikkin hjá forsetanum.
Trump sigur seg kortini vera til reiðar at samstarva við Demokratarnar.
