Kommunulæknaviðtalan í Vágum er víðkað úr tveimum upp í tríggjar viðtalur. Hinar báðar hava tilsamans umleið 3.470 borgarar knýttar at sær.

Nýggja viðtalan er farin í gongd, eftir at hølini eru góðkend. Heilsutrygd og Vága kommuna hava samstarvað um hølini.

Enn eingin fastur lækni

Heilsutrygd søkir eftir einum føstum kommunulækna til triðju viðtaluna. Fyribils arbeiða avloysarar og ein sjúkrarøktarfrøðingur har.

Enn eru eingir borgarar fast knýttir at viðtaluni. Hon hjálpir tí hinum báðum viðtalunum, og borgarar kunnu fáa læknatíð har.

Borgarar kunnu eisini velja at verða fast knýttir at triðju viðtaluni.

Borgarstjórin vónar styttri bíðitíð

Bjarni Prior, borgarstjóri í Vága kommunu, fegnast um nýggju viðtaluna.

– Vit hava leingi arbeitt fyri eini triðju viðtalu í Vágum, og tað er gleðiligt, at hon nú er komin í gongd, sigur hann.

Borgarar kunnu bíleggja tíð við at ringja til kommunulæknaviðtaluna og trýsta 3. Tíðarbóking á netinum verður eisini tøk seinni.