Fólkatalið í Tvøroyrar kommunu minkaði við 36 fólkum frá 1. august 2025 til 1. august 2026. Tað svarar til eina minking á 2,1 prosentum. Størsta orsøkin var flyting til aðrar føroyskar kommunur, skrivar Tvøroyrar kommuna.
Kommunan hevði eitt nettotap á 33 fólkum í flytingum millum Tvøroyri og aðrar føroyskar kommunur. Hinvegin fluttu fleiri til kommununa úr útlondum enn úr kommununi av landinum. 50 fólk fluttu til Tvøroyrar kommunu úr útlondum, meðan 43 fluttu av landinum.
Nettoflytingin mótvegis útlondum var sostatt sjey fólk í pluss. Samstundis vórðu 11 børn fødd, meðan 21 fólk doyðu.
Lønirnar vuksu við 22,5 milliónum krónum
Hóast fólkatalið minkaði, vaks samlaða A-skattaða lønin hjá borgarum í Tvøroyrar kommunu úr 313,3 mió. kr. (313,3 mió. DKK) í 12-mánaðarskeiðinum august 2024 til juli 2025 upp í 335,8 mió. kr. (335,8 mió. DKK) í tíðarskeiðinum august 2025 til juli 2026.
Vøksturin var 22,5 mió. kr. ella 7,2 prosent.
Til samanberingar vaks A-skattaða lønin í Føroyum sum heild við 6,1 prosentum. Samstundis vóru 860 fólk við bústaði í Tvøroyrar kommunu skrásett í arbeiði bæði í juli 2025 og juli 2026.
Kommunan vil kanna fráflytingina nærri
Tvøroyrar kommuna vil nú kanna, um fráflytingin serliga fevnir um barnafamiljur, fólk í arbeiðsførum aldri ella ung, sum fara úr kommununi í sambandi við útbúgving.
Kommunan vísir samstundis á, at Suðuroyartunnilin kann broyta fortreytirnar fyri bæði búseting og arbeiði grundleggjandi. Eitt fast samband kann gera tað lættari at búgva í Suðuroynni og arbeiða aðrastaðni í Føroyum.
