Arbeiðið at útbyggja og dagføra vatnverkið í Lamba er nú farið í gongd. Endamálið er at tryggja eina støðuga og framtíðartryggjaða vatnveiting til bæði húsarhald og vinnu, har tørvurin á vatni alsamt veksur.

Sum partur av arbeiðinum verður verandi vatnveitingarskipan dagførd. Ætlanin er millum annað at endurnýggja verandi brunnar og skifta út eldri rør og ventilar, so skipanin verður meira álítandi og betri før fyri at nøkta framtíðar tørvin.

Áðrenn arbeiðið á verandi skipan kann fara fram, verður ein nýggjur brunnur gjørdur. Hetta er neyðugt fyri at tryggja vatnveitingina, meðan arbeiðið fer fram. Nýggi brunnurin verður eisini ein varandi partur av vatnveitingini og fer at økja um kapasitetin í skipanini.

Fyrireikingarnar til nýggja brunnin, sum verður staðsettur vestan fyri verandi brunnar, eru nú byrjaðar. Í sambandi við arbeiðið kann væntast nakað av óljóði frá grevstri, maskinarbeiði og øktari tungari ferðslu í økinum.

Eftir ætlan verður arbeiðið við vatnverkinum í Lamba liðugt um mánaðarskiftið september/oktober.