27. og síðsta umfar í landskappingini í fótbólti er á skrá seinnapartin í dag. Á Svangaskarði, har NSÍ fer at fáa handað FM steyp og gullkrónur, verður fyrsta bríksl klokkan 14, og í hinum dystunum verður fyrsta bríksl klokkan 15.

Hóast tað er síðsti dagur í oktober, so verður tað sagt frá góðum fótbóltslíkindum seinnapartin. Hann er útsynningur í ættini, vindurin fer ikki at vera til ampa fyri fótbóltsspælið, tað verður turt, sólin fer at síggja, og tað vera upp ímóti 10 hitastigum.

Í feløgunum, har tað stendur nógv upp á spæl, verður tað longu fyrrapartin savnast til upphiting undan avgerandi dystinum. Í Runavík hevur tað í eina viku verið FM hýrur. Í dag eru tað tvær farleiðir út á Svangaskarð. Onnur er, at tað verður gingið eftir gøtuni kring Toftavatn og niðan á Svangaskarð, og hin er, at tað verður farið í ein av bussunum, sum koyrir frá vøllinum í Runavík og út á Svangaskarð. Í NSÍ mæla tey fólki frá at fara við bili út á Toftir, tí tá verður vandi fyri ferðsluproppi.

Størsti spenningurin er á Argjum og í Streymnesi, tí tað er greitt, at saman við B68 fer annað liðið, sum í dag fer at spæla á Argjum, ella Skála ÍF at flyta niður.

Inni í Vika á Argjum hittast AB og 07 Vestur, og við Margáir í Steymnesi hittast EB/Streymur og Skála ÍF.

KÍ – Víkingur: Leivur Zachariasen kl. 15.00

B68 – NSÍ: Jóhan Hendrik Ellefsen kl. 14.00

EB/Streymur – Skála ÍF: Heini Ziska Viðoy kl. 15.00

HB – B36: Eiler Rasmussen kl. 15.00

AB – 07 Vestur: Jákup Øssursson Mohr kl. 15.00