Í gjár og í dag hava vit frætt í KvF, at hondverkarar fara ikki í samhugaverkfall við arbeiðararafeløgunum. 

Eitt annað av teimum stóru fakfeløgunum er Starvsfelagið, og Súni Selfoss, formaður sigur, at tey fara at hava fund hósdagin, har tey fara at viðgera støðuna á arbeiðsmarknaðinum.

Ein spurningur, sum eisini verður tikin upp, er spurningurin um tey skulu fara í samhugaverkfall við arbeiðarafeløgunum. 

Súni Selfoss sigur, at verður niðurstøðan, at tey skulu fara í samhugaverkfall, verður helst talan um eitt 24 tíma samhugaverkfall, sum skal boðast frá 48 tímar frammanundan. Men alt tað skal støða takast til hósdagin.

Hann sigur eisini, at verður talan um samhugaverkfall, verða tað limirnir, sum eru løntir eftir sáttmálanum við Vinnuhúsið, sum fara í verkfall.

Tað eru limirnir hjá Starvsfelagnum í almennu partafeløgunum, Posta, Vága Floghavnm Føroya Tele, o.s.fr.

Hann sigur eisini, at tá ið limir felagsins eru í verkfallli, ella samhugaverkfalli, hava teir altíð fingið endurgjald frá felagnum fyri tað, og verður farið í samhugaverkfakk nú, verður tað einki undantak.

Annars var ein grund fyri, at hondverkarar ikki fóru í samhugaverkfall, at so mistu teir løn, tí hondverkarafeløgini kundu ikki rinda limunum endurgjald fyri eitt samhugaverkfall av hesum slagnum.