Visti tú av, at landskassin krevur 325 krónur í avgjøldum fyri 200 krónur av sjokolátu? og so spyrja vit okkum sjálvi hví tað er so dýrt at liva í Føroyum.
Tíðin er komin til eina uppgerð við mongu avgjøldini í Føroyum.
Á heimasíðuni hjá Taks sæst eitt dømi um hvat eitt kilo av sjokolátu fyri 200 krónur kostar í tolli og avgjøldum.
Fyri 200 krónur av sjokolátu + 50 krónur í frakt og trygging skalt tú rinda 50 krónur í tolli, 136 krónur í punktgjaldi, 109 krónur í MVG og 30 krónur í avgreiðslugjald til Taks. Eitt kilo á sjokolátu við einum fakturaprísi á 200 krónur endar sostatt við at kosta 575 krónur, tá ið tað stendur á køksborðinum.
fyrst í 90'unum fingu Føroyar innført meirvirðisgjald. Samstundis vóru fleiri punktgjøld tikin av.
Men hesi seinastu árini hava vit sæð at fleiri punktgjøld og avgjøld eru løgd afturat seinastu árini, við tí fyri eyga at gjøldini skulu hava ein uppalandi virkna, og annars at skaffa fleiri inntøkur til landskassan.
Sostatt er mann farin frá at meirvirðisgjaldið skuldi avloysa punktgjøld og onnur avgjøld, til at føroysku húsarhaldini í dag rinda BÆÐI meirvirðisgjald og onnur avgjøld.
Tað merkir, at tá ið fólkapensjonisturin, barnafamiljan ella tann lesandi fer inn í handilin at keypa, so fer ein stórur partur av kvittanini í landskassan.
Allir flokkar munnu eiga sín lut í, at vit eru komin hertil.
Men øll politiska skipanin er nú samd um, at tað er ov dýrt at búgva og reka vinnu í Føroyum. Men tá ið vit hava eina rúgvu av avgjøldum, so verður alt dýrari. Tað sigur seg sjálvt.
Tí áttu vit at farið inn og hugt eftir øllum teimum tollum punktgjøldum og avgjøldum, sum gera tað so dýrt at liva og reka vinnu í Føroyum.
Tí havi eg sett ein §52 fyrispurning til landsstýrismannin í Fíggjarmálum, fyri at fáa eina støðulýsing, umframt at hoyra hvat landsstýrismaðurin ætlar at gera við málið.
Bjarni Kárason Petersen,
Løgtinsmaður fyri Framsókn
